Астананың коммуналдық қызметі тәулік бойы күшейтілген режимде жұмысын жалғастыруда. 18 қаңтар күні қар тазалау жұмыстарына 2 500-ден астам жол жұмысшысы жұмылдырылды, деп хабарлады Aqnews.kz
Қаланы қар мен мұздан тазарту бойынша күндізгі ауысымға 2 512 жол жұмысшысы және 1 500-ден астам арнайы техника шықты.
18 қаңтарға қараған түні коммуналдық қызмет мамандары елордадан 50 мың текше метрден аса қар шығарды, бұл 3 626 ауыр жүк көлеміне тең.
Қыс мезгілі басталғалы бері қар полигондарына 168 825 рейс, 2,3 млн текше метрден аса қар шығарылды.
Айта кетсек, Астанада бірнеше қар полигоны жұмыс істейді. Олардың барлығы самосвал техникасының нөмірлік белгілерін оқу жүйесімен, бейнебақылаумен және жарықтандырумен жабдықталған.
