Астанада Көрісу күні – Амал мерекесіне арналған іс-шара өтті

Мерекелік шара Сарайшық ауданының тұрғындары мен қала қонақтарына арналып ұйымдастырылды. Ұлттық дәстүрді насихаттауға бағытталған бағдарлама барысында ақсақалдар мен әжелер ақ батасын беріп, көрісу дәстүрінің мән-маңызы дәріптелді.

Іс-шарада Белсенді ұзақ өмір сүру орталығының өнерлі ата-әжелері ән шырқап, тағылымды көрініс көрсетті.

Көріністі тамашалауға жиналған балаларға сый-сияпат таратылды. Сонымен қатар қолөнер шеберлерінің бұйымдарынан көрме ұйымдастырылып, келушілерге ұлттық өнердің әсем үлгілері ұсынылды.

«Бүгін – Наурызнаманың бастауы саналатын Көрісу күні. Осы бір Амал мерекесінде біздің Орталықтың зейнеткерлері де шет қалмай, белсенділік танытып, ән мен күйден шашу шашты. Зияткерлер клубының ата-әжелері тамаша көрініс көрсетіп, ал «Тұмар» ансамблінің өнерпаздары мерекенің сәнін кіргізді», – деп барша жиналған қауымды Амал мерекесімен құттықтады Белсенді ұзақ өмір сүру орталығының директоры Серік Қарабатыров.

Сол сияқты «Тұмар» фольклорлық ансамблінің орындауындағы «Өз елім», «Қалқатайдың дауысы-ай», «Тобылғы сай», «Қоғалы-ай» әндері сауда орталығына келген қала тұрғындары мен қонақтарының көңілін баурап алды.