Қазіргі уақытта 3686 жеке тұрғын үй, 557 аула аумағы және 1822 саяжай су астында қалып отыр. Бұл туралы орталық коммуникациялар қызметінде өткен брифингте ТЖМ төтенше жағдайларды жою департаментінің бастығы Қахарман Оразалин айтты, деп хабарлайды Aqnews.kz
Оның айтуынша, Атырау, Ақтөбе, Ақмола, Қостанай, Батыс Қазақстан, Солтүстік Қазақстан, Павлодар облыстарында су тасқыны кезеңі басталғаннан бері 72 029 адам құтқарылды, оның ішінде 16 078 бала бар. Уақытша орналастыру пунктеріне 14 368 адам жайғастырылды, оның ішінде 7 255 бала бар.
"ТЖМ, Қорғаныс министрлігі және Ұлттық ұланның әуе кемелерімен құтқару жұмыстары жалғасуда. 7,5 млн текше метрден астам еріген су тартылды, 952 мың қапшық және 976 мың тонна инертті материал төселді. Авариялық-құтқару жұмыстарына 12 455 адам және 1,3 мың техника, 7 әуе кемесі жұмылдырылды", - деді спикер.
Республикалық жедел штабтың бақылауында Атырау, Ақтөбе, Ақмола, Қостанай, Батыс Қазақстан, Солтүстік Қазақстан және Павлодар облыстары тұр.
